БИШКЕК, 15-май — Sputnik. Бишкек ШИИБдин жыйындар залында "Өлкөнүн келечеги биздин колубузда, кылмыштуулукка жана экстремизмге жол жок" деген форуму өттү. Бул тууралуу муфтияттын маалымат кызматы билдирди.
Иш-чарага КРдин ички иштер министри Мелис Турганбаев, Бишкек шаарынын мэри Албек Ибраимов жана шаар казысы Садридин ажы Мажитов катышып, көйгөйлүү маселелерди чечүү боюнча кеңири талкуу жүргүзүштү.
"Мектептен баштап жаштарыбызга ыйман сабактарын өтүшүбүз керек. Чыныгы исламды жаш муундарга жеткиришибиз абзел. Анткени алардын арасынан эртеңки мамлекетибиздин келечек муундары болгон эл башчылары, министр, депутаттар тарбияланып чыгышат", — деди Мажитов.
Шаар казысы өз сөзүндө жаштардын ыймандуу болуп тарбияланышы келечек үчүн өтө маанилүү экендигин баса белгиледи.
