БИШКЕК, 28-апр. — Sputnik. Жогорку Кеңеш Үркүндүн 100 жана Кыргызстандын эгемендүүлүгүнүн 25 жылдыгына карата жаза өтөп жаткан 3374 жаранга мунапыс берүү боюнча мыйзам долбоорду коомдук талкууга алып чыкканы парламенттин сайтында айтылат.
Долбоорго ылайык, беш жылга чейинки мөөнөткө биринчи жолу соттолгон жашы жете элек балдар, 60 жаштан ашкан эркектер жана 55 жаштан ашкан аялдар, I жана II топтогу майыптар, экиден кем эмес жашы жете элек балдары же I жана II топтордогу майып балдары бар үй-бүлөдө жалгыз багуучу болуп саналган адамдар, чоң коркунуч келтирбеген жана анча оор эмес кылмыштар үчүн соттолгон адамдар бошотулушу шарт.
Мындан тышкары, мыйзам жаза мөөнөтүн жатак-абакта өтөп жаткан соттолгондордун жарымына, атайылап кылмыш жасагандыгы үчүн 10 жылга чейинки мөөнөткө эркинен ажыратылгандардын үчтөн бирине, 15 жылга чейинки мөөнөткө соттолгондордун төрттөн бирине жана жашы жете электердин жарымына да жайылтылат.
Аталган мыйзам долбоорун депутаттар Мыктыбек Абдылдаев, Мирлан Жээнчороев, Чолпон Султанбекова, Айбек Алтынбеков, Мирлан Бакировдор демилгелешти.
