БИШКЕК, 21-апр. — Sputnik. Жүк ташуучу MAN үлгүсүндөгү унаа ток өткөргүч түркүктү сүзүп, элди жарыксыз калтырды. Бул тууралуу "Түндү электр" ААКнын маалымат кызматы билдирди.
Окуя 20-апрелде күндүзгү саат 12.30да Төкөлдөш конушунда болгон. Натыйжада 150дөн ашык үй электр энергиясыз калган.
"Алты киловаттык ток өткөргүч түркүктү Россиянын жараны оор жүк ташуучу унаасы менен сүзүп алган. Бактыга жараша, жабырлануучулар жок", — деп айтылат маалыматта.
Адистер бир саатка жетпеген убакытта оңдоо иштерин жүргүзүп, элди жарык менен камсыздашкан.
"Түндүк электрдин" берген маалыматы боюнча түркүктү сүзгөн айдоочу иштеген россиялык компания бардык чыгымдарды төлөп берүүнү моюнга алышты. Учурда келтирилген чыгымдын суммасы такталып жатат.
Жыл башынан бери Бишкекте ток өткөргүч түркүгүн сүзүү фактысы үчүнчү ирет катталып жатат.
