БИШКЕК, 20-апр. — Sputnik. Канат Исаев менен Бакыт Төрөбаев тең добуш алып, төрагалыкка башка талапкер чыгарылмай болду.
Эсеп комиссиясынын маалыматы боюнча эки талапкер тең 51ден добуш алып, 14ү каршы болгон. Ал эми үч бюллетень жараксыз деп табылган. Комиссиянын төрагасы Мирлан Жээнчороевдин айтымында, мыйзамга ылайык спикерди тандоо боюнча жаңы шайлоо башка талапкерлер менен өтөт.
Шайлоодон кийин эки талапкер тең эч кандай капачылыгы жок экенин айтышты.
Исаев мындай көрүнүш Кыргызстандын тарыхында биринчи жолу болуп жатканына токтолду.
"Баары Алладан. Мындайды атайлап жасасаң да болбойт. Биз буюрса дагы төрт жарым жыл чогуу иштешебиз. Колдогон депутаттарга ыраазычылык билдирем. Эч капачылык жок", — деди Исаев.
Ал эми Бакыт Төрөбаев өз кезегинде муну менен жашоо бүтпөстүгүн, алдыда жакшы пландар бар экенин кошумчалады.
"Урматтуу депутаттар, баарыңыздарга рахмат. Мен Өмүрбек Текебаевден сурасам мындай шайлоо тарыхта биринчи жолу болуп жатканын айтты. Бул тагдыр экен. Мен ыраазымын. Депутаттарга таза шайлоо өткөргөнү үчүн ыраазычылык билдирем. Бүгүнкү күн менен турмуш бүтпөйт, алдыда дагы көп иштешебиз", — деди Төрөбаев.
Эске сала кетсек, өткөн бейшемби күнү парламентте төраганы шайлоо маселеси күн тартибине киргизилип, бирок кворум болбой, спикерди шайлоо бүгүнкүгө белгиленген. Ал эми буга чейинки төрага Асылбек Жээнбеков бир тууган агасы өкмөт башчылыкка көрсөтүлгөндөн кийин кызматынан баш тарткан.
Бириңерден бириң эр, төрага болчу кимиңер? Исаев менен Төрөбаев тууралуу фактылар Sputnik Кыргызстан материалынан окуңуз>>
