БИШКЕК, 13 апр. — Sputnik. Бүгүн, 13-апрелде Жогорку Кеңештин спикери Асылбек Жээнбеков спикерликтен кетти. Ал жумуштан кетүүсүн өкмөт башчылыкка бир тууган агасы Сооронбай Жээнбековдун келиши менен түшүндүрдү.
Ал ортодо бошоп калган спикерликке Канат Исаев менен Бакыт Төрөбаевдин талапкерлиги каралып жатканын Sputnik Кыргызстан агенттигине парламенттеги өздүк булактар кабарлады.
Спикер болот дегендердин бири Бакыт Төрөбаев 2010-жылы "Республика" партиясынан парламенттин бешинчи чакырылышына депутат болуп келген. Ал эми 2015-жылкы шайлоого "Өнүгүү" партиясын түптөп, аталган партия алтынчы чакырылышта 13 мандатка ээ болгон.
Бакыт Төрөбаев депутаттык ишмердүүлүгүндө 30 мыйзам долбоор жазган. Анын ичинде төрт мыйзам долбоорун өзү жазса, калганын башка депутаттар менен биргеликте иштеп чыккан. Алардын 21и кабыл алынып, төрт мыйзам долбоору артка кайтарылган. Ал эми беш мыйзам долбоору учурда каралууда.
Турак-жай жана унааларды милдеттүү камсыздандырууну токтотуучу мыйзамды жазгандардын катарында. Аталган мыйзамга ылайык, милдеттүү камсыздандыруу 2019-жылдын 1-январына жылдыруу демилгеленүүдө.
Мындан сырткары, кылмыш жазык процессуалдык кодексине жана кылмыш жаза кодексине өзгөртүүлөрдү жана толуктоолорду киргизген мыйзам авторлорунун катарында.
Ал эми дагы бир спикер болот делген эл өкүлү Канат Исаев дагы бешинчи чакырылышка "Республика" партиясынын атынан депутат болуп келген. Бирок 2013-жылдын 15-майында ал партиядан чыгып, "Ынтымак" тобун түзгөн.
Парламенттин алтынчы чакырылышына Исаев "Кыргызстан" партиясынын лидери болуп келген. Жалпысынан Исаев 11 мыйзам долбоорунун автору болгон. Жазылган мыйзамдардын баары Жогорку Кеңеш менен президенттен колдоо тапкан.
Эске сала кетсек, Канат Исаев 2013-жылдын аягында депутаттыктан кетип, Чүй облусунун ыйгарым укуктуу өкүлү болгон.
Бул маалыматтар аталган фракциялардын катчылыгынан алынды.
