ӨКМ: кийинки жумада күн сууктайт

БИШКЕК, 15-апр. — Sputnik. Эмки жумадан баштап Кыргызстандын аймагында туруксуз аба ырайы күтүлө турганын Өзгөчө кырдаалдар министрлиги билдирди.

Маалыматка ылайык, 18-апрелден 22-апрелге чейин мезгил-мезгили менен жаан, тоолуу райондордо кар жаап, апта башында Чүй, Талас, Ош, Жалал-Абад, Баткен облустарынын айрым жерлеринде жаан-чачын катуу жаашы күтүлөт. Тоолуу аймактарда автожолдор тоңголок, тайгак болот. Кээ бир райондордо батыштан соккон шамалдын ылдамдыгы секундасына 15-20 метрге чейин жетет. 

Абанын температурасы 10-12 градуска чейин төмөндөйт. Мында Чүй, Талас, Ош, Жалал-Абад, Баткен облустарынын дыйканчылык аймактарында түнкүсүн 3…8, күндүз 10…15 градус жылуу, Ысык-Көл, Нарын облустарынын дыйканчылык аймактарында түнкүсүн 1…6, күндүз 8…13 градус, тоолуу райондордо түнкүсүн 3…8 градус суук, күндүз 2…7 градус жылуу, бийик тоолуу райондордо түнкүсүн 10…15, күндүз 0…5 суук болушу күтүлөт.

Мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатат. 

Күтүлүп жаткан нөшөрлүү жаан-чачынга байланыштуу Чүй, Талас, Ош, Жалал-Абад жана Баткен облустарында сел жүрүүсү мүмкүн. Мындан улам аталган министрлик арык системаларын тазалоону сунуштайт.