БИШКЕК, 30-мар. — Sputnik. Дүкөндөн каалаган нерсенин бардыгын эстен чыгарбастан сатып алуу үчүн алдын ала тизме түзүп алуу керек. Эгер тизме жаныңызда жок болуп калса, дүкөнгө кирер замат сатып алууну баштоо сунушталбайт. Бул тууралуу Journal of Consumer Psychology агенттигине чыккан материалда айтылганын РИА Новости жазып чыкты.
Адистердин айтымында, дүкөнгө тизме жок барып калган адам, алгач текчелерде тизилген товарларды карап чыгышы керек. Себеби, адам үйгө эң керектүү болгон нерселерди эстеп кетиши мүмкүн.
"Көпчүлүк жарандар дүкөнгө барардын алдында тизме түзүшпөйт. Себеби, эң керектүү нерселерди унутпай тургандай элестетишет", — деп билдирет окмуштуу Дэниел Фернандес.
Фернандес кесиптештери менен биргеликте дүкөнгө барган бир нече миң жарандардын аракетин изилдөөгө алып, "мыкты шоппинг" формуласын иштеп чыгышты.
Сыноонун жыйынтыгында, сатып алуучулардын көпчүлүгү күнүмдүк колдонгон керектөөлөрдү унутпастан алышкан. Бирок, батышта көп колдонулбаган кызылча, кокос ж.б. азык-түлүктөрдү сатып алууну эстеринен чыгарышкан.
Ал эми колунда тизмеси бар жарандар менен дүкөндүн текчелерин шашпай карап чыккан сатып алуучулар, эч нерсени унутпастан каалаганын алып чыгышкан.
Мындан улам окумуштуулар, чөнтөккө алдын ала жазылган тизмени салып же тизме жок болуп калса дүкөндү кыдыра текчелердеги продуктуларды толук карап чыгууну сунушташат.
