БИШКЕК, 18-мар. — Sputnik. Тарых жана маданият жылын, Бүткүл дүйнөлүк көчмөндөрдүн экинчи оюндарын өткөрүүгө жана аларга даярдык көрүүгө 1,8 миллиард сом бөлүнүүдө. Бул туурасында каржы министри Адылбек Касмалиев өкмөттүн жыйынында билдирди.
"Керектеле турган чыгымдарды каржылоо булактары табылып, тийиштүү органдар тарабынан макулдашуудан өттү", — деди министр.
Жыйында премьер-министр Темир Сариев Тарых жана маданият жылынын алкагында аткарылчу иш-чараларды өз убагында аткарууга көңүл бурууга чакырды.
"Өкмөт мүчөлөрүнүн өзүнө жүктөлөгөн жоопкерчиликти толугу менен аткарылууга тийиш. Берилген тапшырмалар жана аларды сапаттуу аткаруу тартибине өзгөчө көңүл бурулат", — деди Сариев.
Өкмөт башчысы бул иш-чараларды өткөрүүнүн мааниси чоң экенин белгилеп, бөлүнгөн каражатты натыйжалуу пайдаланууну тапшырды.
