БИШКЕК, 9-мар. — Sputnik. Кыргызстандык теннисчилер допинг колдонбой турганын теннис боюнча Кыргызстан курама командасынын мурдагы капитаны Георгий Котляревский Sputnik Кыргызстан маалымат агенттигине билдирди.
Котляревский Шарапованын мындай аракетин унутчаактыгы же кандайдыр бир пиар кадам болушу мүмкүн деген ойдо.
"Спортчулар допингди колдонгондо аны табуу дээрлик мүмкүн эмес. Ал үчүн кан да тазаланат (допингдин калдыктары калбашы үчүн). Андан сырткары мельдонийге эмнеге тыюу салынганын түшүнбөйм. Анткени ал эч нерсе деле бербейт", — дейт ал.
Андыктан Шарапованын оюндан көп убакыт четтетилиши мүмкүн эместигин Котляревский кошумчалады. Ошондой эле, ал улуттук теннисттеги допинг тууралуу айтып берди.
"Биздин теннисчилер допингди колдонбойт. Биринчиден, ал өтө кымбат. Экинчиден, ал химия. Үчүнчүдөн, аны алдыңкы эң кыйын делген жүз оюнчунун катарына киргендер колдонот", — дейт экс-капитан.
Допинг — спортчулардын көрсөткүчүн жакшыртуу үчүн колдонулуучу каражат. Ал оюн, мелдеш учурунда дененин чыдамкайлыгын жасалма түрдө арттырат. Бирок, ал ден соолукка олуттуу зыян алып келет.
