БИШКЕК, 3-мар. — Sputnik. Өкмөткө караштуу Дене тарбия жана спорт боюнча мамлекеттик агенттигинин Дирекциясына медициналык препараттарын жогору баада сатып алуу фактысы боюнча кылмыш иши козголду. Бул тууралуу Мамлекеттик улуттук коопсуздук комитетинин (МУКК) маалымат кызматы билдирди.
2015-жылдын августтунда Дирекциянын кызматкерлери мыйзам бузууга барып, "Елеу" ЖЧКсы менен 8 млн. 273,1 миң сомдук медициналык препараттарды сатып алуу боюнча келишим түзгөн.
Бул факты боюнча МУККтун Тергөө башкармалыгы КР Кылмыш-жаза кодексинин 304 ("Кызматтык абалынан кыянаттык менен пайдалануу"), 306 ("Кыргыз Республикасынын кызыкчылыктарына каршы контракт түзүү, мамлекеттик сатып алууну жүзөгө ашыруу") жана 189 ("Ачык соода-сатыктарды, аукциондорду же тендерлерди өткөрүүнүн тартибин бузуу") беренелерине ылайык кылмыш ишин козгоду.
Азыркы маалда тергөө иштери жүрүп жатат.
