БИШКЕК, 1-мар. — Sputnik. Бишкекте тогуз жаштагы баланы чаян чагып алганын Sputnik Кыргызстан агенттигине Тез жардам станциясы билдирди.
Окуя "Ак-Жар" жаңы конушунда болгон. Чаян баланын мойнун чагып алганын чакырылган Тез жардам кызматкерлери аныкташкан.
Балага үйүнөн медициналык жардам көрсөтүлгөн, ооруканага жаткыруудан анын ата-энеси баш тарткан.
"Бул бакча өсүмдүктөрү менен келген чаяндар болсо керек. Жазында алар чыга башташат. Мындан эки жыл мурун түштүк аймактагы жаңы конуштардын биринен кара курттун чакканы катталган", — деп билдиришти станциядан.
Адистердин маалыматы боюнча Кыргызстанда жашаган чаяндардын чакканы өлүмгө алып келбегени менен жабыркаган киши катуу ууланышы мүмкүн. Дарыгерлер Тажикстандын чөлдөрүндө жашаган чаяндардын уусу өтө кооптуу экенин эскертишет.
