БИШКЕК, 1-мар. — Sputnik. Эртең 2-мартта өлкөнүн көпчүлүк аймактарында жаан, тоо этектеринде жана тоолуу райондордо кар жаашы күтүлөт. Бул тууралуу Өзгөчө кырдаалдар министрлиги билдирди.
Маалыматка ылайык 2-3-март күндөрү түнкүсүн абанын температурасы төмөндөйт. Ош, Жалал-Абад, Чүй облустарынын өрөөндөрүндө, Баткен облусунун дыйканчылык аймактарында түнкүсүн 0…5 градус суук, күндүз 7…12 градус жылуу болот. Ал эми Талас өрөөнүндө жана тоо этектеринде түнкүсүн 6 градуска чейин суук болот.
Ал эми айрым райондордо батыштан соккон шамалдын ылдамдыгы секундасына 15-20 метрге, Ысык-Көл акваториясында 19-24 метрге чейин жетет.
Мындай аба ырайы автожолдордун абалын начарлатат, автоунаа, энергетика, коммуналдык кызматтардын ишин жана жайыттарда мал кармоону кыйындатат.
