БИШКЕК, 23-фев. — Sputnik. Нефть экспорттоочу өлкөлөрдүн уюму (ОПЕК) АКШны нефть өндүрүү көлөмүн чектөө боюнча сүйлөшүүгө чакырганын CERAWeek жүрүшүндө картелдин башкы катчысы Абдалла Салем Эль-Бадри билдирди.
"Мен Европа биримдиги менен да, орустар менен да, кытайлар менен да сүйлөшүп жатам. АКШдан башкасынын баары менен жолугушуулар болууда. Менин каалаганым эле — диалог", — деди ал.
Муну менен бирге катчы сүйлөшүүлөр АКШнын монополияга каршы мыйзамына каршы келбеши керектигин белгиледи.
Energy Intelligent Group компаниясынын божомолу боюнча 2016-жылы башка өлкөлөргө салыштырмалуу АКШ нефтини көп өндүрөт.
АКШ конгресси декабрь айында 1975-жылдан бери нефтинин экспорттолушуна салынган тюуну алып салды. Буга чейин Түндүк Дакотанын сенатору Хайди Хайткамп эркин базарды колдой турганын айтып, АКШ Сауд Аравиясы, Россия жана башка нефть өндүрүүчүлөр менен атаандаш боло турганын белгилеген.
Өткөн аптада Россиянын энергетика министри Александр Новак менен Сауд Аравиясы, Венесуэла жана Катар мамлекеттеринин өкүлдөрү менен Дохада өткөн жолугушуунун натыйжасында 2016-жылы нефтини январь айындагы көлөмдүн чегинде казуу тууралуу макулдашуу түзүлгөн. Бул демилгени Иран колдой турганын билдирген. Бирок бейшемби күнү Сауд Аравиясы жетишилген келишимден баш тарткан. Өлкөнүн ТИМ башчысы Адиль аль-Джубейр анын мамлекети нефть казууну азайтууга даяр эмес экенин айтып, бирок башкалар азайтса базар турукташышы мүмкүн деген билдирүү тараткан.
