БИШКЕК, 9-фев. – Sputnik. Египеттеги Хеопс пирамидасынын чокусуна чыгып кеткен 18 жаштагы германиялык туристти өлкөгө өмүр боюу кире албай тургандай чечим чыгарылды. Бул тууралуу The Telegraph басылмасы жазып чыкканын РИА Новости жарыялады.
"Байыркы Египеттин тарыхы боюнча иш алып барган министрлик германиялык 18 жаштагы туристти өмүр бою өлкөгө кире албай тургандай чечим чыгарды. Андре Чисельский мыйзам менен корголгон 139-метрлик пирамиданын чокусуна чыгып кеткен", — деп айтылат маалыматта.
Андре пирамидага чыгып бара жатып элдин кыйкырып, полиция чакырып жатканын көргөн. Бирок, жолун токтоткон эмес.
"Пирамиданын чокусунан сүрөткө түшүү мен үчүн бардыгынан маанилүү болду", — дейт жаш турист.
Египетте пирамиданын чокусуна чыгууга тыюу салынган. Мыйзам бузгандар үч жылга чейин соттолот. Бирок, мюнхендик жигитке өлкө полициясы гумандуулук көрсөтүп камаган эмес.
