БИШКЕК, 4-фев. — Sputnik. Кыргыз Эл баатыры, Токтогул сыйлыгынын ээси, залкар акын Сооронбай Жусуев 91 жаш курагында 4-февралда каза болду. 30дан ашык китеби кыргыз тилинде, 14 китеби орус тилинде жарык көргөн. Ыр китептери казак, өзбек, украин, азербайжан, тажик тилдеринде басылган.
Залкар акындын былтыр 2015-жылы 90 жылдык мааракеси мамлекеттик деңгээлде белгиленген.
Sputnik Кыргызстан маалымат агенттиги Сооронбай Жусуевдин турмуш жолуна жана чыгармачылыгына баам салып, бурулуш учурларды тизмектеди. Төмөндө акын тууралуу кызыктуу жана маанилүү фактыларды окуңуздар.
- 18 жашында армияга аттанып, 1943-1945-жылдары Панфилов атындагы 8-гвардиялык дивизяда байланышчы болуп иштеген. Согуш учурунда эки жолу жарадар болгон.
Ал журналисттик кесипке 1946-1947-жылдары Совет районунда (азыркы Кара-Кулжа району) "Коммунизм үчүн" гезитинде жооптуу катчы болуп иштөө менен аралашкан. Кийин "Ленин жолу" гезитинде бөлүм башчы, "Ала-Тоо" адабий журналында башкы редактор, "Чалкан" журналында жооптуу катчы болуп эмгектенген.
70тен ашык ырына обон чыгарылган. Жусуев 2003-жылы небересине арнап "Канат менен Зарина" дастанын жазган. Ага музыка жазылып, кыргыз ырчылары да аткарган. Бул дастан орус, тажик, түрк, өзбек жана башка тилдерге которулуп, китеп болуп чыккан.
Кыргыз адабиятына кошкон салымы үчүн 1981-жылы "Эл акыны" наамы берилип, 1986-жылы персоналдык пенсия дайындалган.
Тарыхый каарман Алай канышасына арнап жалаң ыр менен "Курманжан датка" аттуу роман жазган. Бул эмгеги үчүн Токтогул атындагы мамлекеттик сыйлык берилген.
2007-жылы эң жогорку артыкчылык даражасындагы "Ак шумкар" белгиси жана "Кыргыз эл баатыры" наамдары берилген.
2015-жылы 90 жылдык мааракеси мамлекеттик деңгээлде белгиленген.
