БИШКЕК, 18-янв. — Sputnik. Кыргызстандын "Бруклин" командасы КВНдин КиВиН-2016 фестивалына катышкандан кийин борбордук лигага өткөнүн команданын жетекчиси Евгений Акопян билдирди.
Анын айтымында, кыргызстандык команда кыска программадан кийин катталган 400 команданын ичинен эң мыкты жүздүккө кирген.
"Жогорку рейтинг алып, дагы бир жолу өз деңгээлибизди көрсөттүк. Биздин программабыз мыкты болду. Кыргызстандыктардын тамашасы баарына жагып, көпкө чейин кол чаап, коштоп турушту. Эми Кыргызстандын курама командасы КВНдин борбордук лигасынын каалаган оюндарына катыша алат", — деди Акопян.
КиВиН-2016 оюндарына катышуу үчүн түрдүү мамлекеттерден 587 команда арыз берген.
Эл аралык КиВиН-2016 фестивалы 11-25-январь күндөрү Красная Поляна (Сочи) шаарында өтөт. Анда телеберүүгө тартыла турган командалар тандап алынат. Фестиваль гала-концерт менен аяктап, Россиянын Биринчи каналы тартат.
