БИШКЕК, 11-янв. — Sputnik. Кыргызстанда кыз-келиндер ичимдикке канчалык жакын экендигине Улуттук статистика комитети менен ЮНИСЕФ биргеликте байкоо салыптыр.
Иликтөө көрсөткөндөй, өмүрүндө жок дегенде бир жолу ичип көргөндөр Бишкек шаарында жашаган аялзаттары кең. Бул 63 пайызды түзгөн. Республиканын ичинен Баткен облусунда жашаган кыз-келиндер ичпегендердин көч башына чыкты. Алардын 83 пайызы арак деген немени оозуна алып көрбөптүр.
Статистика көрсөткөндөй, "сеп" этип койгондордун көбү акчалуу жана жогорку билимдүү аялдар болуп чыкты. Социалдык статусу менен билими канчалык жогору болсо, жок дегенде бир ирет ичимдиктин даамын татуу мүмкүнчүлүгү көп болот дешти аталган уюмдар.
