БИШКЕК, 12-дек. — Sputnik. Президент Алмазбек Атамбаев Түркмөнстандагы эл аралык конференцияда сүйлөп жатып Россия менен Түркияны элдешүүгө чакырды. Бул тууралуу өлкө башчынын маалымат кызматы билдирди.
Мамлекет жетекчисинин Түркмөнстанга болгон иш сапары кечээ, 11-декабрь күнү башталган. "Нейтралитет саясаты: Тынчтык, коопсуздук жана өнүгүү үчүн эл аралык кызматташуу" аттуу конференцияга чейин Атамбаев Грузия жана Түркмөнстандын президенттери менен жолугуп, сүйлөшүүгө жетишти.
Атамбаев Белоруссия президенти Александр Лукашенконун Россия менен Түркиянын элдешүүсүн сунуштаган чакырыгын колдой турганын белгилеп, өнөктөштүк жылуу мамилени өз калыбына келтирүүнү өтүндү.
Эскерте кетсек, россиялык Су-24 учагын атып түшүргөндөн кийин Россия менен Түркиянын мамилеси солгундап кеткен.
Ал эми президент Атамбаевдин иш сапары Түркмөнстандан кийин Кувейт өлкөсүндө уланмакчы.
