БИШКЕК, 7-дек. — Sputnik. Кыргызстандык Сирожиддин Мухтаров аттуу 25 жаштагы жаран Сирияда Кыргызстан менен Өзбекстандан барган согушкерлерден өзүнүн жамаатын түзүп, террористтерди даярдап жүрөт. Бул туурасында "Россия" телеканалы Сириядан качып келип, учурда Урал аймагында абакка киргизилген кишинин айткандарына таянып маалымдады.
Алардын бири, "Жаннат ашыктары" террористтик уюмунун мүчөсү Абдулазиз аттуу жарандын айтымында, Сирияда Сирожиддин Мухтаровду 200гө чукул согушкерлерди идеялык жана согуштук жактан даярдаган амир деп аташат. Ал идеялаштары арасында Абу Салох деген ат менен белгилүү экендигин ФСБнын кызматкерлерине кармалган согушкер айтып берген.
Телеканалдын маалыматында, Мухтаров алгач, Дамаск шаарына билим алуу максатында багыт алып, ал жактан "Аль-Каида" террордук уюмуна кирип кеткен.
Аталган кыргызстандык жаран туурасында КРдин Улуттук коопсуздук боюнча комитети маалыматтар бар экендигин, учурда бул багытта иш жүргүзүлүп жаткандыгын айтты.
"Андай маалыматтар бизде бар, учурда бул багытта тиешелүү иштер жүргүзүлүп жатат", — дешти УКМКнын өкүлү.
Кыргызстандын күч кызматтарынын берген маалыматтарында Сирия, Ирак, Афганистанга чыгып кеткендердин саны 500гө чамалап барат. Алардын арасынан үй-бүлөсү менен чыгып кеткен фактылар бар. Ал эми "Жаннат ашыктары" Кыргызстанда ишмердүүлүгүнө тыюу салынган террористтик уюмдардын катарына киргизилген.
