БИШКЕК, 1-дек. — Sputnik. Казакстандын президенти Нурсултан Назарбаев мамлекет Дүйнөлүк соода уюмунун толук кандуу мүчөсү болгонун жар салды. Бул тууралуу өлкө башчынын маалымат кызматы билдирди.
Июль айынын соңунда Назарбаев Женевада Казакстандын Дүйнөлүк соода уюмуна кирүү боюнча бардык протоколдорго кол койгон. Бул боюнча сүйлөшүү дээрлик 20 жылдык убакытты алган.
Президенттин айтымында, бул окуя көз карандысыз мамлекеттин тарыхындагы орчундуу окуя катары калат.
"Бул биздин мамлекеттин тең укуктуу соода-экономикалык өнөктөш катары кабыл алынышын далилдейт. Дүйнөлүк соода уюмуна кирүү менен экономиканын маанилүү тармагын ээлей турган биздин экспортерлор үчүн да, чет элдик инвесторлор үчүн да жаңы мүмкүнчүлүктөр ачылат", — деди Назарбаев.
Өлкө башчы бизнес үчүн мыкты шарты бар өлкөлөрдүн дүйнөлүк рейтингинде Казакстан 41-орунду ээлей турганын кошумчалады.
