БИШКЕК, 1-дек. — Sputnik. Биринчи Май райондук акимиаты барар жери жок селсаяктык менен күн кечирген жарандардын ичинен өнөкөт дартка чалдыккандарын, анын ичинен кургак учук, СПИД илдетине чалдыккандарды аныктоо боюнча кайрымдуулук акциясын өткөргөнүн мэрия билдирди.
90 селсаяк мончого түшүп, медициналык кароодон, СПИДге карата экспресс-тесттен жана кургак учукту аныктоочу флюорографиялык текшерүүдөн өттү. Муну менен бирге аларга ысык тамак, жылуу кийим-кече берилип, айрымдарына юридикалык жана психологиялык жардам көрсөтүлдү.
Текшерүүнүн натыйжасында 10 жаран сасык тумоо менен жабыркаганы аныкталган, алтоосунан өнөкөт бронхит аныкталды. Беш жаран аз кандуулук илдетине кабылып, үчөө буту-колун күйгүзүп алганы белгилүү болду.
"Дене мүчөлөрүн үшүк алып кеткен үч жаран аныкталды. Мындан тышкары, 10 жаран цистит, тогузоо сарык, бирөөсү сифилис менен жабыркары маалым болду. Кургак учук жана СПИДге чалдыккандар кабылган жок", — деп айтылат билдирүүдө.
Текшерүүнүн жыйынтыгы менен бардык бейтаптар тийиштүү дарылануудан өтүү үчүн медициналык мекемелерге жөнөтүлдү.
