БИШКЕК, 30-ноя. — Sputnik. Милицияга 25 жаштагы жаран кайрылып, 21-ноябрда Сузак районунун айылдарынын биринде аны белгисиз үч адам сабап, чөнтөк телефонун тартып алганын айткан. Милиция бул кылмыш ишине шектүү делген бир жаранды кармады. Бул тууралуу ИИМдин маалымат кызматы билдирди.
Ыкчам-иликтөө иш-чараларынын жүрүшүндө каракчылыкка шектүү деп Чөлөк-Төр айылынын 19 жаштагы тургуну кармалды.
Учурда анын шериктерин кармоо боюнча издөө иштери жүрүп жатат жана аталган факты боюнча Кылмыш жаза кодексинин 168-беренеси (каракчылык) менен кылмыш иши козголду.
