БИШКЕК, 29-окт. — Sputnik. Байыркы Ош шаарынын келечеги кең экенин президент Алмазбек Атамбаев Ош шаарынын 3015 жылдыгына карата жолдогон куттуктоосунда белгиледи.
Өлкө башчынын айтымында, Ош – Кыргызстандагы гана эмес, Борбордук Азиядагы байыркы шаарлардын бири.
Президент касиеттүү Сулайман тоонун этегиндеги шаар аркылуу Улуу Жибек Жолу өтүп, Батыш менен Чыгышты, Европа менен Азияны байланыштырып турганын белгилеп, калааны көптөгөн элдин өкүлдөрү байырлап, нечен-нечен кылымдар бою ынтымакта жана биримдикте жашоонун жакшы салттарын калыптандырганын айтып өттү.
"Эзелтен Ош кол өнөрчүлөрдүн, соодагерлердин, усталардын жана зергерлердин башын бириктирип, берекенин, молчулуктун жергеси болуп келген. Эгемендик жылдары Кыргызстаныбыз татаал жол, тайгак кечүүлөрдөн өттү. Ниети бузук саясатчы сөрөйлөр элдин ынтымагын ыдыратып, мамлекеттин биримдигине коркунуч келтиргенде жалпы Кыргызстан эли түп көтөрүлө Ош шаарынын тургундарына жардамга келди. Туруктуулукту калыбына келтирип, тынч турмуш жолуна түшүүгө жапа тырмак көмөктөштү", — деп айтылат куттуктоодо.
Атамбаев акыркы жылдары Ош шаарынын эмгекчил, мээнеткеч эли эриш-аркак жашап, өнүгүүнүн туруктуу жолуна түшкөнүн белгиледи.
"Биздин максат — ата-бабаларыбыз кылымдар бою калыптандырган ынтымакты жана биримдикти көздүн карегиндей сактоо. Пейилибизди оңдоп, бир жеңден кол, бир жакадан баш чыгарып, Ошту кийинки муундар суктангыдай шаарга айландыруу. Байыркы Ош шаарынын келечеги кең. Бирок шаарыбызды өнүктүрүп, көрктөндүрүүнү бийликтен гана күтпөйлү, бул бардыгыбыздын ишибиз. Шаардын ар бир тургуну жашоосун жакшыртууга, айлана-чөйрөсүн көрктүү кылууга өз салымын кошууга тийиш", — деди президент.
Өлкө башчы куттуктоо соңунда Ош калаасынын тургундарына чың ден-соолук, бак-таалай жана ынтымак каалап, байыркы сыймыктуу шаар мындан ары дагы гүлдөп, өнүгүп өсө берсин деген тилегин билдирди.
