БИШКЕК, 27-окт. — Sputnik. ЕАЭБ мамлекеттеринин 18 жаштан 34 жашка чейинки жаштары жалпы жонунан евразиялык интеграцияга оң көз карашта экенин Евразия өнүктүрүү банкынын изилдөөсү аныктады.
Сурамжылоого КМШ өлкөлөрү (Армения, Беларуссия, Казакстан, Кыргызстан, Молдова, Россия, Тажикистан, Украина) менен Грузиянын 11 миңден ашуун тургуну катышкан. Мында жооптор өлкөгө жараша бири-биринен кескин айырмаланып турат.
Тажикстандын ЕАЭБге кирүү мүмкүндүгү калк арасында жакшы кабыл алынууда (жаштар 69 пайыз, улуу муун 75 пайыз). Мындай мамиле жакында эле биримдикке мүчө болгон Кыргызстанда да сакталган (84 пайыздан кем эмес).
Таптакыр эки бөлөк жыйынтыкты Молдова менен Грузия көрсөттү. Биринчи мамлекеттин жаштары Молдованын ЕАЭБге кошулушуна караманча каршы болгондор басымдуулук кылса, Грузияда, тескерисинче, уюмга кирүүгө кызыкдар жаштар көп экени белгилүү болду. Мында улуу муун жалпы жонунан биримдикке мүчө болууну туура кабыл аларын билдирген.
Билим алуу, ишке орношуу, илимий-техникалык жана башка багыттарда эл аралык кызматташуу боюнча жаштар негизинен Европа өлкөлөрүнө жана АКШга басым жасай турганы аныкталган.
Изилдөөнүн натыйжасында КМШ жаштары негизинен Европа өлкөлөрүнөн билим алууга умтулары маалым болду. Тажикстанда гана КМШ өлкөлөрүнүн, көбүнесе Россиянын окуу жайлары жаштар арасында популярдуу.
Сурамжыланып жаткан жаран канчалык жаш болсо, ошончолук европа, америка жана япон товарларына басым жасай турганы белгилүү болду.
Евразиялык өнүктүрүү банкы мүчө-мамлекеттердин экономикалык өсүшүн камсыздай турган эл аралык финансы уюму. Казакстан менен Россиянын ортосундагы макулдашуунун негизинде 2006-жылы түзүлгөн.
