БИШКЕК, 21-окт. — Sputnik. Дем алыш күндөрү 24-25-октябрда Ысык-Көл облусунун Бөкөмбаев айылында салбурун турнири өтө турганын Салбурун федерациясынын негиздөөчүсү жана президенти Алмаз Акунов билдирди.
Анын айтымында, бул иш-чарада Катар, Монголия, Казакстан, Түркия, Өзбекстан, Түркмөнстан жана Кыргызстандан саяпкер, мүнүшкөрлөр күч сынашат.
"Салбурунда алгыр куштарды учуруп сынаса, тайгандарды жарыштырып сынашат. Андан сырткары жааны туруп жана атчан чаап келе жатып атуу боюнча да мергендердин физикалык даярдыгы каралат", — деди ал.
Эмне үчүн бул үч түр бириктирилип жатканын ал мындайча түшүндүрдү:
"Салбурун "Манас" эпосунда кеңири айтылып, кеңири сүрөттөлөт. Манас атабыз салбурунга чыкканда аленгир жаадан кыйын атып, Кумайыгын агытып, Ак шумкарын салган. Бул нерсе көчмөн элдердин күнүмдүк турмушунда өзгөчө жоокерлер үчүн керек болгон. Алар согуш болбогон учурда, аңчылык менен өзүнүн физикалык даярдыгын, каруу-күчүн табында сактап келген".
Мелдеш шумкар таптоо, чырга тартуу, тайгандардын жарышы, жаа атуу боюнча өтүп, ат чабыш, кыз куумай менен коштолот. Андан сырткары, кыздардын жана жаш балдардын таймаштары да өзүнчө өтөт.
Жалпысынан 9 номинация боюнча байгелер ыйгарылып, жеңүүчүлөр кубок жана медалдар менен сыйланат.
