БИШКЕК, 21-окт. – Sputnik. Бир нече миң америкалыктардын жүрөгүнүн абалына жасалган байкоолор эркек менен аялдын жүрөгү ар кандай тездикте жана эки башка жол менен карый тургандыгын көрсөттү деп айтылат Radiology журналында жарык көргөн макалада.
"Эркектин да, аялдын да жүрөгү карыган сайын өз формасын өзгөртөт. Бирок бул өзгөрүүлөр эки башка жол менен жүрөт. Алсак, эркектин жүрөгү оор тартып, кан сыйымдуулугу төмөндөйт. Ал эми аялдарда мындай болбойт. Бүгүн биз жекелештирилген медицина жөнүндө көп кеп кылуудабыз жана биз жасаган ачылыш эмне үчүн аял менен эркектин жүрөк көйгөйлөрүнө эки башка караш керектигине мисал болот", — дейт Жонс Гопкинс унверситетинен (АКШ) окумуштуусу Жон Энг (John Eng).
Он жылдан ашык убакытка созулган бул байкоолордун алкагында медиктер эксперименттин катышуучуларын мезгил-мезгили менен магниттик-резонанстык томографиядан өткөрүп, жүрөктөрүнүн жана анын ички түзүмүнүн үч ченемдүү сүрөттөрүн алып турушкан.
Организм карыган сайын пайда болчу өзгөрүүлөргө байкоо салуу үчүн макаланын авторлору дал ошол сүрөттөрдү пайдаланышкан. Бир караганда эле андан бөтөнчө бир нерсе байкалды деп айтылат макалада. Жүрөктүн сол карынчасынын көлөмүн жана салмагын салыштырып жатып, окмуштуулар бул бөлүк аял менен эркекте эки башка жол менен карый турганын аныкташкан.
Энгдин айтымында, бүгүнкү күнү медиктер жүрөк ооруларынын өрчүү коркунучун эхокардиография менен оңой өлчөнө турган жүрөк капталдарынын жооноюшуна карап баалашат. Мындай өзгөрүүлөр аялда болбогондуктан, медиктер алардын жүрөк жана жүрөк тамырларында пайда болуучу көйгөйлөргө толук баа бере албашы жана туура эмес дары жазып берип коюшу мүмкүн деп окумуштуулар тыянак чыгарган.
