БИШКЕК, 7-авг. — Sputnik. Түркиялык адистер жүрөккө акысыз жасай турган операцияны бейтапка 120 миң сомго соодалаган дарыгерлер боюнча Саламаттык сактоо министрлиги комментарий бербейт. Бул тууралуу министрликтин маалымат кызматы Sputnik агенттигине билдирди.
Жүрөк хирургиясы жана органдарды трансплантациялоо илимий изилдөө институтунун директорунун орун басары жана кардиология бейтапканасынын кызматкерлери Ош облусунан келген оорулуудан операция үчүн 120 миң сом талап кылышкан. Туугандары 114 миң сом чогултуп берсе да, акча сураган көлөмдө болбогондуктан, оорулууга бир ай бою операция жасалган эмес. Ооруканадан чыккандан кийин ал айылына жетпей каза болгон.
Министрликтин маалымат кызматы аталган ишти тийиштүү органдар текшерип, тергеп жатканын билдирди.
"Аталган окуяны укук коргоо органдары тергеп жаткандыктан министрлик азыр эч кандай комментарий бербейт", — деп билдирди маалымат кызматы.
Аталган медициналык мекеменин кызматкерлерине башкы прокуратуранын тергөө башкармалыгы тарабынан "Пара талап кылуу", "Пара алуу" беренелеринин негизинде кылмыш иши козголду.
