БИШКЕК, 20-окт. — Sputnik. Жерди прикладдык изилдөөлөр боюнча Борбор Азия институтунун иликтөөлөрү мамлекеттик органдар тарабынан колдонулбай жатканын премьер-министр Темир Сариев аталган мекеменин ишине арналган жыйында билдирди.
Анын айтымында, сеймология, суу ресурстарын изилдөө, жаратылыш кырсыктарын алдын алуу, гляциология, климаттын өзгөрүшү боюнча маанилүү изилдөөлөрдү жүргүзүп келген институт мамлекеттик органдар менен байланышты күчөтүүсү зарыл.
"Өкмөт илимий институт жана мекемелердин иликтөөлөрүнө таянып өз ишин жакшыртууга аракет кылышы керек. Бул жаатта Жерди прикладдык изилдөөлөр боюнча Борбор Азия институтунун изилдөөлөрүн активдүү колдонуу зарыл", — деди Сариев.
Жерди прикладдык изилдөөлөр боюнча Борбор Азия институту 2005-жылы ачылган. Ал геодинамика, геокатастрофалар, климат, суу жана табигый байлыктар жаатында изилдөөлөрдү жүргүзүп келет. Институт акыркы жылдары Сары-Жаз дарыясында гидроэлектрстанцияларды куруу үчүн геолого-геофизикалык, Кыргызстан жана Борбор Азиянын башка өлкөлөрүндөгү ири шаарлардын сейсмикалык аймактарга бөлүү, Тянь-Шань жана Фергана бассейинин мисалында жер көчкүлөрдүн жылышын байкоо жана алдын-алуу боюнча изилдөөлөрдү ишке ашырган.
