Сариев илимий изилдөө институтунун ишмердигин сынга алды

БИШКЕК, 16-июль — Sputnik. Премьер-министр Темир Сариев Улуттук стратегиялык изилдөөлөр институтунун директору Талант Султановду кабыл алганын өкмөттүн маалымат кызматы билдирет. 

Маалыматка ылайык, өкмөт башчы аталган институттун ишмердигин сынга алып, өз милдетин тиешелүү деңгээлде аткарбай жатканын айтты.

"Улуттук стратегиялык изилдөөлөр институту мамлекеттик органдардын ишмердигине анализ жасап, коомдогу социалдык-экономикалык абалды, маселелерди аныктоо жана өкмөттүн стратегиялык чечимдерди кабыл алышында илимий, аналитикалык жана маалыматтык колдоо көрсөтүүсү зарыл. Бирок учурда институт мындай ишмердүүлүктү жүргүзбөй жатат", — деди Сариев.

Султановго премьер-министр кыска убакыттын ичинде өкмөттүн стратегиялык чечимдерди кабыл алуусуна илимий, аналитикалык жана маалыматтык колдоо көрсөтүү, инновациялык жана инвестициялык долбоорлорду иштеп чыгуу жана өлкөнүн интеллектуалдык ресурстарын өнүктүрүү боюнча долбоорлорду даярдоо, өлкөнүн экономикалык абалы боюнча оперативдүү түрдө анализ жүргүзүп, кооптуу тармактарды аныктоо жана аларды минималдаштыруу боюнча сунуштарды иштеп чыгууну тапшырды. 

Муну менен катар аталган институтка өкмөттүн аппараты менен тыгыз иш алпаруу тапшырмасы да берилди.