БИШКЕК, 28-сен. — Sputnik. Кыргыздын белгилүү опера ырчысы Болот Миңжылкиевдин 75 жылдыгына арналган ТҮРКСОЙдун "Опера күндөрү" деп аталган эл аралык фестивалы Стамбулда башталып, Түндүк Кипрде уланып, Анталияда аяктады. Анталиянын Аспендос байыркы театрында XVIII фестиваль өз ишин жыйынтыктап, ал жерде Моцарт, Верди, Россини сыяктуу дүйнөлүк ири композиторлор менен бирге эле түрк тилдүү композиторлор Молдобасанов, Караев, Исмагилов, Адыгюзеловдун чыгармалары жаңырды.
Бул туурасында ТҮРКСОЙдун Кыргызстандагы элчиси Кожогелди Кулуев маалымдады.
Ал эми Казакстан, Азербайжан, Түркия, Башкортостандан келген балет өнөрүнүн чеберлери ачык асман алдындагы театрдын сахнасына "Спартак", "Жети сулуу", "Дон-Кихот" балеттерин алып чыкты.
Улуу ырчынын юбилейине арналган фестивалга Азербайжан, Казакстан, Кыргызстан, Түркмөнстан, Түркия, Түндүк Кипр, Татарстан, Башкыртстан, Синьцзянь-Уйгур Автономиялуу районунун искусство чеберлери катышты.
