БИШКЕК, 11-сен. — Sputnik. Сирияда каатчылыкты саясий жөнгө салууда Россия башкы роль ойной алат жана качкындарга байланышкан маселени чечиш үчүн муну Европа мойнуна алышы керек деп жазат Норвегиянын Dagens Næringsliv гезити.
2013-жылы эле Россия Сирияда химиялык курал колдонулду деген маселеге байланышкан абалды жөнгө сала алган. Анда Москва Сириянын президенти Башар Асад менен химиялык демилитаризациялоо боюнча макулдашкан. АКШ болсо буга жетиш үчүн күч колдонгону жаткан. Азыр Россия "Ислам мамлекетине" каршы күрөштө Башар Асадга көмөк көрсөтүп жатат деп эске салат басылма.
"…Сирияда абал тынчтык жолу менен чечилсе, Асад дагы бир канча убакыт бийликте болорун батыштын түшүнүшүнө убакыт жетти. Азыр эң башкы милдет — тынчтыкка жана туруктуулукка жетишүү. Бирок Европа биримдиги Асад кетиши керек деп талап кылып жатат. Бул акылдуу кадам эмес, себеби Европа чыр-чатакка аскердик кийлигишүүгө даяр эмес, ошон үчүн эч таасир көрсөтө албайт", — деп айтылат макалада.
Ливияда болгон окуя Сирияда кайталанышына жол бербөө үчүн бардык аракеттерди көрүш керек. Белгилүү болгондой Ливия аздыр-көптүр туруктуу мамлекеттин ордуна террористтик топтор гүлдөгөн жерге айланды. Жагдайды саясий чечим кабыл алуу менен гана жөнгө салууга болот деп жазат Dagens Næringsliv.
"Бул жерде Россиянын белгилүү бир дипломатиялык ролу бар, Ирандын өзөктүк программасы боюнча макулдашуудан кийин Тегеран да өз салымын кошууга даяр. Мындайды жасоого АКШ менен Сауд Аравиясы да даяр болушу керек. Ал эми эч нерсе чече албаган жана болуп жаткандарга көз салып гана турган Европа эми ушундай саясий чечимди активдүү колдошу керек", — деп айтылат макалада.
2015-жылдын башынан бери Европа биримдигинин аймагына 350 миңге жакын мигранттар келген жана алардын саны күн санап миңдеп өсүүдө. Россия Сирия каатчылыгын чечүүдө жардам берүүгө даяр экенин бир нече жолу билдирген.
