БИШКЕК, 3-сен. — Sputnik. Аламүдүн районунун Арашан айылында териси сыйрылган эшек табылганын Чүй облустук ИИББдин маалымат кызматы билдирди.
Арашан айылындагы токойдогу суунун жанынан союлуп, териси сыйрылган үч эшек табылган. Ал жерге барган милиция кызматкерлери алардын терисин тапкан эмес.
Арашандын тургуну 30-августтан 31ине караган түнү эшектери жоголуп кеткени жөнүндө милицияга билдирген. Эртеси мал жайып чыгып, териси сыйрылып жаткан эшектерин таанып, аны айыл өкмөтүнө кабарлаган. Эшектин кожоюну эч кимге дооматы жоктугун билдирип арыз жазганын Чүй облустук ИИББ маалымдады.
Үч эшектин эти айылдан алынып чыгып, атайын жайга жеткирилип, көмүлдү.
Бул факты Аламүдүн райондук Ички иштер бөлүмүнүн каттоосуна алынып, учурда иликтөө иштери башталды.
"Эшек" чыры
Сокулук районундагы Ак-Жол айылында эшек союлуп, эти сатылып жатканы боюнча 2015-жылдын февраль айынын соңунда маалымат тарап, ал коомчулукта чоң талкууну жараткан.
Аталган чыр боюнча эшек союп, эттерин экспортко даярдады делген "Кай-Тал" ишканасынын жетекчилиги эт Кытайдын Гонконг шаарындагы зоопаркка жөнөтүлмөк деген маалымат берген.
Ал эми андан бир нече күн өткөндөн кийин жарандык активисттер эшек эттеринин өрттөлүп, ал эми аны союп, тараткандар жазага тартылсын деген талап менен тынчтык митингине чыгышкан. Ал эми "Кай-Тал" ишканасынын жетекчиси, ишкер Алмаз Такырбашевге карата эшектерди мыйзамсыз сойгондугу үчүн кылмыш иши козголуп, аны иликтеп чыгуу боюнча атайын комиссия түзүлгөн.
Май айынын орто ченинде Кочкор районунун бир катар айылдарында күздөн бери эшекти союп, терисин сыйрып кеткен учурлар катталып жаткандыгы маалым болгон. Жергиликтүү эл союлган эшектердин эттери талаага ташталып жатканын билдиришкен.
