Бишкек, 27-фев. — Sputnik. Бүгүн Сокулук районунун Ак-Жол айылындагы эшек союлган жайдын жанында жарандык активисттер жума намаздан кийин митинг уюштурмакчы.
Ал арада райондук бийлик өкүлдөрү түшкө жакын Сокулук районун Ак-Жол айылында тиешелүү органдардын катышуусунда жыйын өткөрүп, иштин чоо-жайын талкуулаарын айтты. Митинг уюштуруучулар жергиликтүү бийликке аталган иш-чараны өткөрүү боюнча расмий кайрылган эмес. Бул туурасында Sputnik сайтына Сокулук районун акиминин орун басары Алмазбек Таштемиров билдирди.
"Эмненин негизинде митинг өткөргөнү жатышат, бул туурасында бизге эч кандай маалымат келип түшкөн жок. Бир аздан кийин Ак-Жол айыл өкмөтүндө бардык кызматтар — РИИБ, Финпол, прокуратура, Санэпидкөзөмөл, Экотехинспекция кызматтарынын катышы менен толугу менен жыйын өткөрөм. Кандай иш кылынды, иш козголду, козголбодубу, кандай деңгээлде текшерилип жатат деген бир нече суроолордун тегерегинде кеп болот", — деди Таштемиров.
Ал эми митингдин уюштуруучусу Таалайбек Керималиев митингди өткөрүүгө уруксат сураган кагазды Сокулук районунун акимчилигине таштагандыгын, ал эми Манас айыл өкмөтүнө кайрылганда жергиликтүү бийлик буга уруксат бербегендигин билдирди.
"Митинг өткөрүү боюнча айыл өкмөтүнө кайрылсам, макул эместигин билдирди. 3 күн мурда алдын ала маалымдаш керектигин айтышты. Мен аларды бизди колдойт деп ойлогом… Ал эми жума назамдан кийин өтө тургандыгынын себеби, эл түштөн кийин колу бошоп калат, көбүрөөк болот деген эле ой", — деди Керималиев.
Аким эшектердин эти өндүрүлүп жаткан аймак боюнча маалыматы буга чейин болбогондугун, эгерде мурда кабардар болушса, аны жаптырганга аракет кылмактыгын айтты.
"Эгерде биздин кабарыбыз болсо, мурда эле барып жапмакпыз. Айланасы алты чакырымдай узундукта курчалган, бийиктиги 3 метрдей дубал менен тосулган, жеке аймакта жайгашкан экен. Ал жерде болжол менен 150дөй, ар кандай ишмердик менен алектенген ишканалар бар деген маалыматты айтышты. Алар бука баккандар, тоок фермалары, козу карын ж.б өстүргөндөр экен. Жашыруу иштеп келишкен деп айтып жатышат. Биздин кызматтар эки күндөн бери ошол жакта жүрүшөт. Ишти прокуратурабы, финполбу же РИИБ козгодубу маалымат алабыз", — деп билдирди Таштемиров.
Бул окуя 9-февралда эле катталып, Сокулук райондук милициясы тарабынан кылмыш иши козголгон. Бирок, бул иш Экономикалык кылмыштарга каршы күрөшүү кызматына өткөрүлүп берилген.
Манас айыл өкмөтүнө караштуу Акжол айылындагы эшек союлган жай "Кайтал" акционердик коомуна тийиштүү. Коомдун башчысы Алмаз Такырбашев эшек союп сатуу бизнеси мыйзамдын негизинде гана болгонун айткан.
