БИШКЕК, 2-сен. — Sputnik. Ош шаарынын Амир-Темир аймактык кеңешиндеги 95 орундуу "Бөбөк" балдар бакчасы өкмөт башчысы Темир Сариевдин катышуусунда ачылды.
Өлкөнүн өнүгүшү үчүн биримдик, ынтымак жана тартиптин мааниси чоң экенин белгилеген Сариев өкмөт бул жааттагы иштерин улантарын убада кылды.
"Өлкөдө биримдик, ынтымак болсо колубуздан баары келет. Бардык талапка жооп берген бала бакчаларды, мектептерди курабыз. Биз бүгүн бала бакчаларды ачуу менен келечегибизге дагы бир эшик ачып жатабыз", — деди премьер-министр.
Мыйзамсыз менчиктештирилген 119 бала бакчанын имараты мамлекетке кайтарылганын кошумчалады.
95 орундуу бул бала бакчанын имараты 2012-жылы курула башталган. Ага республикалык бюджеттен 34 миллион, жергиликтүү бюджеттен 8 миллион сом бөлүнгөн.
