БИШКЕК, 28-авг. — Sputnik. Премьер-министр Темир Сариев Айыл чарба жана мелиорация министрлигине техниканы лизинг ыкмасы менен берүү процессин жакшыртуу тапшырмасын бергенин өкмөт башчынын маалымат кызматы билдирет.
Бейшемби күнү Сариев министрлик, өкмөттүн облустардагы ыйгарым укуктуу өкүлдөрү, мекеме жетекчилери жана район акимдери менен түшүм жыйноо боюнча селектордук жыйын өткөрдү.
"Алдын ала божомолдорго ылайык, быйылкы жыл түшүмдүү болот, өткөн жылга салыштырмалуу 10,5 пайызга жогору болору мерчемделүүдө. Жакында дыйкандар түшүм жыйнай башташат, акимдер айыл чарба продукциясынын жармаңкесин уюштуруусу зарыл", — деди премьер-министр.
Мындан тышкары, Айыл чарба министрлигине техниканы лизинг ыкмасы менен берүү процессин жакшыртуу тапшырылды.
"Фермерлер лизингге трактор, комбайн ала албай жатышкандыктарын айтышууда. Анткени дароо техниканын жалпы баасынын 20 пайызын төлөө — оор. Демек, муну 10 пайызга чейин түшүрүү зарыл. Башыңарды чайкабагыла, маселени чечүүнүн жолун тапкыла. Керек болсо камсыздандыруу фондун түзгүлө", — деди Сариев.
Премьер-министр Мамлекеттик монополияга каршы агенттигине сүттүн баасы тууралуу маселени чечүүнү тапшырды — өндүрүүчүлөрдүн баасы төмөндөгөнү менен дүкөндөрдө мурдагыдай эле нарк менен сатылууда.
Мындан тышкары, өкмөт башчы кымбатташы болжолдонуп жаткан төө буурчактын баасын жөнгө салуу зарылдыгын белгиледи.
