БИШКЕК, 28-авг. — Sputnik. Билим берүү жана илим министрлигине караштуу атайы фонд түзүлүп, ал өлкөнүн мугалимдеринин ден соолугун чыңдоо маселеси менен алектене турганын премьер-министр Темир Сариев билим берүү кызматкерлеринин III съездинин жабылуу аземинде билдирди.
Анын айтымында, мугалимдердин жана билим берүү кызматкерлеринин саламаттыгын чыңдоо маселеси олуттуу түрдө каралбай, эс алуу борборлоруна жана санаторийлерге жолдомолор калыс бөлүнгөн эмес.
"Мен сиздердин алдыңыздарда Билим берүү жана илим министрлигине билим берүү кызматкерлеринин Профсоюздук федерациясы менен биргеликте аталган маселе боюнча тийиштүү сунуш киргизилишин, ал эми Финансы министрлигине бул Фондду каржылоо булактарын жана механизмдерин аныктоо тапшырмасын берем", — деди өкмөт башчы.
Республиканын бардык аймагынан келген билим берүү кызматкерлеринин башын бириктирген съезд 26-27-август күндөрү Бишкекте өттү. Билим берүү системасында жүргүзүлгөн иш-аракеттердин жыйынтыгын чыгаруу жана 2015-2016-жылдарга карата өнүгүү багытын аныктоону аксаттаган съездде беш блокко бириикен 11 секция иш алып барды.
