Шакек менен смартфон сифилисти, гонореяны аныктоого жардам берет

БИШКЕК, 24-авг. — Sputnik. Казакстандык, перулук жана мексикалык эки окумуштуу менен бир ишкерден турган топ жыныстык оорулардын бар-жогун заматта аныктоочу жабдыкты ойлоп табышты.

Дүйнө жүзүндө жыл сайын 15 жаштан 23 жашка чейинки 500 миллиондой жаштар хламидиоз, сифилис, трихомониаз же гонорея ооруларынын бирин жуктуруп алат. Баштапкы мезгилде дартка чалдыкканын адам сезбейт, ошондуктан алгачкы күндөрү оорунун белгилерин аныктоо зарылчылыгы бар. 

Хооп (Hoope) деп аталган, шакек түрүндөгү портативдик жабдуунун бир жолу колдонула турган, ичинде ийнеси бар картриджи манжадан кан алып, бир-эки көз ирмемде эле анализдин натыйжасын көрсөтөт жана аны өзү bluetooth аркылуу смартфонго жиберет. 

Электроддору сезгичтикти төмөндөтө турган шакек бармакка кийилет. Кнопканы басканда, ийне манжаны өзү сайып, кан диагностика жүргүзө турган чипке өзү тиет. 

Эгер канда жугуштуу оору аныкталса, шакекте жайгашкан төрт жарыктын бири күйөт. 

Мындай жабдууну түзүү жөнүндө ой мексикалык роботтор боюнча техник Эрнесто Родригездин, казакстандык биотехнолог Дамель Мектепбаеванын жана перулук бизнес-стратег Ирина Румшинанын жолугушуусу учуруна пайда болгон. Калифорнияда NASA изилдөө борборуна караштуу Singularity University программасынын астында чогулуп, алар бул идеяны жүзөгө ашыруунун үстүндө иштешкен. 

Башкаларга окшобогон бул идея бир нече эл аралык стартап турнирлеринин жеңүүчүсү болгон. Иштеп чыгуучулардын тобу Кореяда World Startup Competition эл аралык конкурсун, Чили, Мексика, Перу өлкөлөрүндө конкурстарда утуп чыккан. 2015-жылдын июлунда идея World Cup Tech Challenge конкурсунда (Кремний өрөөнү, АКШ) "Медицина тармагындагы технологиялар" наамы боюнча жеңүүчү болгон. 

Жабдууну Кытайда чыгаруу пландалууда, анын болжолдуу баасы 50 АКШ долларын түзөт.