БИШКЕК, 24-июнь — Sputnik. Эс алуучу жайлары сифилис же башка жыныстык оорулардын бактериялары бар кальяндарды бериши мүмкүн экенин Sputnik агенттигине Республикалык ден соолукту чыңдоо борборунун дарыгери Анара Калиева билдирди.
Жакында вице-премьер-министр Дамира Ниязалиева бир да кафе кальяндарды дезинфекциялабайт деп билдирген эле. Бул туурасында борбор калаанын 200дөн ашык коомдук тамактануу жайларын текшергенден кийин белгилүү болгон.
Эксперттин маалыматына ылайык, сарык, кургак учук жана ашказандын шишик оорулары пайда кылуучу инфекциялар да коркунуч жаратат.
Кальян боюнча адис Абубакр Тошевдин айтымында, кафелерде иштегендер кальяндын түтүктөрүн жана колбаларын жууганга жараксыз каражаттарды колдонуп, абалды дагы татаалдатып жатышат. Жылуулук менен нымдын таасири астында химиялык заттар чегип жаткан адамдын өпкөсүнө барып, зыян келтирет.
"Ден соолукка зыян келтире турган кальянды таап билүү кыйын эмес. Анын түтүгүнөн жагымсыз жыт келип, ал эми колбада чөгүндүлөр болот", — дейт Тошев.
Түтүктөрдү жуугандан кийин көпкө кургатыш керек, ошондуктан көпчүлүк кафелер үчүн аларды күнүнө бир жолудан көп жууп туруу пайдасыз.
Улуттук статистикалык комитеттин маалыматына ылайык, кыргызстандыктар тамеки өндүрүмдөрүнө, анын ичинде кальян чегүүгө жыл сайын 4 миллиард сомдон ашык сарп кылышат.
