БИШКЕК, 12-авг. — Sputnik. Казакстандын президенти Нурсултан Назарбаев ЕАЭБ алкагында кыргыз-казак чек арасындагы бажылык көзөмөлүн алуу салтанатында сүйлөп жатып, Алматыдан Чолпон-Ата кыска автожолу жолу курула тургандыгын айтты.
"Туристтердин Казакстандан Чолпон-Атага кыска жол менен келүүгө салуу маселелерин карайбыз. Негизи эле, бул жолугушуу эки тараптуу бардык маселелерди кароого мүмкүнчүлүк берди. Бүгүн электр энергиясы, суу маселелерин бирге чечүүнү сүйлөштүк", — деди Назарбаев.
Салтанат учурунда журналисттерге маалымат берип жатып Кыргызстан президенти Алмазбек Атамбаев бул өзгөчө Ысык-Көлдүн жашоочулары үчүн жакшы болгондугун айтты.
"Казакстан тарап автожол куруу боюнча долбоорду колдоду. Бүгүн Алматыдан келүү үчүн 480 чакырым эле, Кудай буюрса, 1- 2 жылдан кийин 240 чакырым жол курулат", — деп кошумчалады Атамбаев.
Кыргыз-казак чек арасындагы көзөмөл-өткөрүү пункттарын кошпогондо Кыргызстандын чек арасында бардыгы болуп 15 көзөмөл-өткөрүү пункттары бар.
Бүгүн кыргыз-казак чек арасындагы бажы көзөмөлдөө пункту алынып салынды. Аны ачууга Кыргызстан менен Казакстандын президенттери телекөпүрө аркылуу күбө болду.
