БИШКЕК, 11-авг — Sputnik. ЕАЭБге толук кирип, кыргыз-казак чек арасындагы бажы көзөмөлдөрү алынар алдында Темир Сариев Евразиялык экономикалык комиссиясынын коллегиясынын төрагасынын милдетин аткаруучу Татьяна Валоваяны кабыл алды.
Темир Сариев Кыргызстандын ЕАЭБге кирүү жараянында арбын иштер аткарылганын белгилеп, аталган жараянда көрсөткөн көмөгү үчүн Татьяна Валоваяга ыраазычылык билдирди. Анын жыйынтыгында, тиешелүү процедуралар аяктап, 12-августта кыргыз-казак мамлекеттик чек арасында бажы көзөмөлүнүн алынарын кабарлады.
"Биз эртеңден тарта ири биримдиктин курамына киребиз. Бул биз үчүн тарыхый кадам. Мындай окуя бизди абдан чоң иштерди аткарууга милдеттендирет. Анткени жарандарыбыз Кыргызстандын ЕАЭБге кошулуусунан көп нерсени күтөт. Жаңы биримдик жарандарыбызга жаңы мүмкүнчүлүктөрдү ачып, жеңилдиктерди камсыздайт", —деди Темир Сариев.
Сариев бул жаатта бир топ иш аткарылса да, Кыргызстан экономикасын ЕАЭБ шартына адаптациялоо боюнча бир катар иштер турганын белгилеп, бул жаатта уюмдун башка мүчөлөрү жана Евразиялык экономикалык комиссиясы менен тыгыз кызматташууга даяр экенин билдирди.
