БИШКЕК, 11-авг. — Sputnik. Августта бензиндин баасы доллардын курсунан көз каранды болорун КР нефтетрейдерлер ассоциациясы билдирди.
"Бүгүнкү күндөгү маалыматтар боюнча, Россиянын нефтепродукт рыногундагы абал турукташып калды. Август айында мунай заттарын алып келүү баасы июлда кол коюлган келишимдерде көрсөтүлгөн бойдон калды", — деп ассоциациядан билдиришти.
Белоруссиядан да күйүүчү майдын келиши жана мунай заттарын кайта иштетүүчү ири заводдордун оңдоодон кийин ишке кириши бааны бир калыпта сактоого өбөлгө түздү.
Нефтетрейдерлер ассоциациясы билдиргендей, күйүүчү жана майлоочу май менен өлкөнү камсыздоо үзгүлтүккө учурабайт. Учурда тартыштык жок.
Азыр оруп-жыйноо иштери башталгандыктан, бензинге болгон талап чоң. Айыл чарба министрлигинин маалыматы боюнча, бул багытта 50,8 миң тонна күйүүчү май керектелет.
