БИШКЕК, 6-авг. — Sputnik. Бишкекте КР президентинин кубогу үчүн сууда сүзүү боюнча эл аралык мелдеш өтөрүн Мамлекеттик дене тарбия жана спорт агенттиги билдирет.
Эгемендик күнүнө арналган спорт иш-чарасы 14-15-августта өтөт. Ага Казакстан, Россия, Германия, АКШ, Испания өлкөлөрүнүн сууда сүзүүчүлөрү менен бирге республиканын тогуз клубунун спортчулары катышат.
Мелдештин ачылышына премьер-министр Темир Сариевдин катышуусу күтүлүүдө. Бул мелдеш Тайландда сентябрь айында өтө турган Азия чемпионатына спортчуларды тандоонун акыркы баскычы болмокчу.
КР президентинин кубогу үчүн эл аралык мелдеш биринчи жолу Бишкекте 2010-жылы өткөн.
