БИШКЕК, 31-июль — Sputnik. Кол өнөрчүлөрдүн эл аралык "Оймо" фестивалынын катышуучулары менен коноктору шаар борборунан каз катар тизилип өтүштү, дейт Sputnik агенттигинин кабарчысы.
Чүй проспекти менен филармониядан баштап "Ала-Тоо" кинотеатрына чейин өткөрүлгөн жөө жүрүшкө жергиликтүү жана башка мамлекеттерден келген катышуучулар жана коноктор катышты.
"Кыргызстан, АКШ, Франция, Иран, Мексика, Кувейт, Улуу Британия, Индия, Түркия, Афганистан жана башка коңшу мамлекеттерден келген чыгармачыл интеллигенция, кол өнөрчүлөр менен сүрөтчүлөр желектерди булгалап өтүштү", — дейт кабарчы.
Фестивалдын гимни жана ар тилде айтылган саламдашуу алдында өткөн салтанаттуу маршты шаар жашоочулары жагымдуу маанай менен тосуп алышкан.
"Ала-Тоо" кинотеатрынын жанына келгенде катышуучулар менен сүрөткө түшүүнү каалагандар абдан көп болду", — дейт майрамга күбө болгон кабарчы.
"Оймо" – Кыргызстанда 2006-жылдан бери өткөрүлүп келе жаткан кол өнөрчүлөрдүн эл аралык фестивалы. Ал салттуу түрдө июлдун аягында Бишкекте жармаңке менен башталып, Ысык-Көлдө уланат.
