БИШКЕК, 24-июль — Sputnik. Доллар курсу Кыргызстанга чет элдик туристтердин агымынан улам төмөндөп жатканын Sputnik агенттигине "Asia trust consulting" каржы компаниясынын башкы директору Кубанычбек Дүйшөналиев билдирди.
24-июль күнү америка валютасынын расмий курсу 1,2 сомго төмөндөгөн. Эгер 21-июлда валюта рыногунда доллар 62,4 сом болсо, 23-июлда 60,6 сомго бааланган.
Дүйшөналиевдин айтымында, учурда Кыргызстанда эс алып жаткан чет элдик туристтер доллар менен соода кылышкандыктан, анын көлөмү көбөйүүдө. Мындан улам валюта арзандап жатат.
"Бирок бул мезгилдик көрүнүш. Туристтик сезондун аякташы менен доллар кайра өз ордуна келет", — дейт эксперт.
Анын айтымында, долларга болгон баа сентябрь айынан баштап кайра көтөрүлө баштайт.
Кыргызстанда доллар баасынын кескин арзандашы катталып, мындан улам Улуттук банк бейшемби күнү валюта рыногунан 3,2 миллион доллар сатып алды. Интервенция жүргүзүлгөндөн кийин доллардын наркы 61,1 сомго чейин жогорулаганы байкалды.
