БИШКЕК, 14-июль — Sputnik. Бишкектин айланып өтмө жолунан баңгизат жүктөлгөн жүк ташуучу унаа кармалды. Бул тууралуу баңгизатты мыйзамсыз жүгүртүүгө каршы күрөшүү башкы башкармалыгы билдирди.
Маалыматка ылайык, 12-июль күнү пияз жүктөлгөн төрт унааны текшерүүдө жашылча менен кошо капка салынган героин табылган.
Баңгизатты мыйзамсыз жүгүртүүгө каршы күрөшүү башкы башкармалыгынын жетекчиси Алымжан Козубаевдин айтымында, унаа ичинен алынган баңгизаттын жалпы салмагы 40 килограмм 650 граммды түзөт. Тажикстандан келе жаткан героин Мосвкага жөнөтүлмөк.
"Кыргызстан аркылуу өткөн эл аралык жана трансулуттук каналдын жолу буулду. Адистердин белгилөөсүндө, алынган баңгизаттын сапаты жана сынамы абдан жогору. Учурда баңгизат жөнөтүүчүлөрдүн чоо-жайы такталууда", — деди Козубаев.
Адистер Кыргызстандын көмүскө базарында героиндин бир килограммы 10-12 миң доллар турса, Россияда 20-25 миң долларга жете турганын кошумчалашты.
Учурда баңгитрафигине тиешеси барларды кармоо боюнча ыкчам-иликтөө иштери жүрүп жатат.
