БИШКЕК, 6-июль — Sputnik. Чаткалдын Айгыр-Жал айылындагы топтошкон мушташуудан райондук ооруканага түшкөндөрдүн ичинен, төртөөсү бычак жеген. Бул туурасында райондук оорукананын башкы дарыгери Санжар Тайырев Sputnik маалымат сайтына билдирди.
Башкы дарыгердин айтымында балдардан алкоголдук ичимдиктер чыккан эмес, баары соо болгон. Жаагына бычак сайылган баланын жарааты оорураак жеринде болгондуктан, аны облустук ооруканага жиберишкен. Учурда алардын абалы дурус.
"5-июлга караган түнү, саат 00:05 мүнөт өткөндө алты бала түшкөн. Бирөөнө ылдыйкы жаактан өйдө көздөй бычак сайылган. Ага биринчи жардам көрсөтүлүп, каны токтолулган соң, жараат оор жерде болгон үчүн облуска жөнөттүк. Экинчи бала санынан, дагы бири жамбашынан, төртүнчүсү тизесине бычак жеген. Бешинчисинин мээси чайкалган, таш же катуу нерсе менен башка чабышкан",— деди Тайырев.
Жалал-Абад облусунун Чаткал районунун Айгыр-Жал айылында 4-июлдан 5-июлга караган түнү 20-22 жаш курагында балдар арасында массалык мушташ чыккан. Облустук ИИМ алар студенттер экендигин, алардын аты-жөнү такталып, бирөө убактылуу кармоо жайына отургузулгандыгын билдирген.
