БИШКЕК, 6-июль — Sputnik. Ош шаарындагы Сулайман-Тоо музейинин ичиндеги таш жазуулары туура эмес реставрацияланып, уникалдуу сталактиддерди кесип салышты деп социалдык баракчага жазган жарандык коомдун өкүлдөрү Ош шаарынын жашоочуларын аны сактап калууга чакырды. Ал эми музейдин жетекчилиги бул дооматтарды четке кагып, музейдин ичиндеги тарыхый эстеликтер толугу менен сакталып турат деп билдиришти.
"Биздин укугубуз" коомдук фондунун жетекчиси Калича Умуралиева ФБдагы баракчасына "Сулайман-Тоодогу "музейдин ичинде реставрациялык иштер эмес, ремонт жүргүзүлүп, анын антыйжасында уникалдуу сталактиддер кесилип бүлгүнгө учураганын айтат. Эң кызыгы маляр Мурод 3 миң жылдык тарыхы бар аска бетиндеги сүрөттөргө өзүнүн ысымын жазып койгон. Реставрация кылууну тапшырган музейдин директору бул иштерге үчүн жооп бериши керек. Ош шаарынын жашоочулары, өзүңөрдүн ыйык тооңор менен, музейди сактап калгыла", — деп жазган.
"Сулайман-Тоо" улуттук тарыхый-археологиялык музей-комплексинин директорунун орун басары Хайрулла Ибайдуллаевдин мындай маалыматтар чындыкка дал келбейт деп айтылгандарын Умуралиева четке какты.
Ош шаарынын милициясына "Сулайман-Тоо" комплексиндеги тарыхый жана архитектуралык эстеликтерди талкалап же мыйзамсыз аракеттер жасалгандыгы боюнча расмий тараптардан арыз түшкөн эмес.
"Аска бетиндеги же таштагы жазууларды талкаланып же жок кылуу аракеттери жасалып, ага айыпкерлерди табуу боюнча арыз түшкөн жок", — деди ИИМдин Ош шаардык жана облустук башкы башкармалыгынын басма сөз кызматынын жетекчиси Жеңиш Ашырбаев.
Ал ыйык тоого зыярат кылгандардын саны күнүнө бир нече миңге жеткендиктен, тоонун сыртындагы таштарга бейбаштар тарабынан жасалган мыйзамсыз аракеттер болушу мүмкүндүгүн кошумчалады.
