БИШКЕК, 3-июль — Sputnik. Жаратылыш газынын наркы быйыл жогорулабай турганын Темир Сариев республикалык штабдын жыйынында билдирди.
Премьер-министрдин төрагалыгы астында республикалык штабдын жыйынында мамлекеттик жана жергиликтүү өзүн-өзү башкаруу органдарынын күзгү-кышкы жылуулук берүү мезгилине даярдыгы тууралуу маалымат угулду.
Иш-чаранын жүрүшүндө Сариев электр энергиясын сарамжалдуу пайдалануу максатында Бишкек шаарын жана Чүй облусун жаратылыш газына өткөрүү зарылдыгына токтолду.
Премьер-министрдин айтымында, "Газпром-Кыргызстан" компаниясы газ менен үзгүлтүксүз камсыз кылуу милдетин аткарат.
Аталган компания жаратылыш газы үзүгүлтүксүз берилерин убада кылган. Анын наркы өкмөт менен макулдашып аныкталган орточо баадан ашпайт жана быйыл ал көтөрүлбөйт", — деди Сариев.
Мындан тышкары, өкмөт башчысы 18 кабаттуу имараттарга жаратылыш газын киргизүүгө уруксат берген токтомго кол койгонун кабарлады.
