БИШКЕК, 30-июнь — Sputnik. Суу түтүгүн орнотуп жатканда топурак басып калып, Кара-Балта шаарынын 63 жаштагы тургуну каза болгонун Өзгөчө кырдаалдар министрлигинин маалымат кызматы билдирди.
Маалыматка ылайык, шаардык суу канал ишканасы эксковатор менен 2,5 метр бийиктиктеги траншея казып кеткен. Ишкананын эки жумушчусу Юрий Конякин менен Анатолий Рябов траншеянын капталынан суу түтүгүн чыгарабыз деп жатканда топурак көчүп кеткен.
Куткаруучулар 60 жаштагы Юрий Конякинди алып чыгышып, Жайыл райондук ооруканасына тез жардамга салып жиберишкен. Ал эми 63 жашар Анатолий Рябов каза болгон. Анын денесин куткаруучулар чыгарып, ички иштер органынын кызматкерлерине өткөрүп беришкен.
