БИШКЕК, 23-июнь — Sputnik. Премьер-министр Темир Сариев 22-июнда Жалал-Абад облусунун Ала-Бука районунда үч адамдын өмүрүн алып кеткен жол кырсыгын териштирүү тапшырмасын берди. Бул тууралуу өкмөттүн маалымат кызматы билдирет.
Жол кырсыгынан каза болгон бүтүрүүчүлөр боюнча кырсыкты вице-премьер, Билим берүү жана илим министрлиги, Ички иштер министрлиги тыкыр териштирет. Ошондой эле буга жол берген адамдардын жоопкерчилиги каралат.
Муну менен катар Сариев бул сыяктуу окуялар кайталанбашы үчүн ата-энелерди жана мектеп мугалимдерин балдарын коопсуздугуна өзгөчө көңүл бурууга чакырды.
Дүйшөмбү күнү бүтүрүү кечесин белгилөө учурунда Жалал-Абад облусунун Ала-Бука районунда болгон жол кырсыгынан Honda Odyssey автомашинасынын ичиндеги үч киши каза болуп, алтоосу райондук ооруканага жеткирилген. Автомашинада бардыгы болуп тогуз киши бара жаткан.
Маалыматтарга ылайык, Honda Odyssey автоунаасынын айдоочусу рулду башкара албай калган.
